"engin algjör blessun"

Það fór aldrei svo að það væri ekki vitnað í mann í Mogganum :-) Það var hringt í mig þegar ég var á leiðinni heim frá Keflavíkurflugvelli á föstudag og spurt hvort ég væri ekki formaður SUT? Ég játti því og þá kom í ljós að þetta var blaðamaður frá Mogganum og vildi spyrja hvort hugbúnaðarfyrirtæki sem seldu afurðir sínar erlendis væru ekki að hagnast á falli krónunnar. Þar sem ég er ekki hrifinn af frjálsu falli krónunnar svaraði ég í samræmi við það og þetta var síðan haft eftir mér í laugardagsblaðinu. Ég tók ekki eftir þessu en þegar ég mætti á hlaupaæfingu í gær þá var vakið máls á þessu svo ég tók til við að finna fréttina en þar segir m.a.:

Erlendar skuldir hækka
Eggert Claessen, formaður Samtaka upplýsingafyrirtækja, sagði lágt gengi „enga algjöra blessun“ fyrirhugbúnaðarfyrirtæki sem selji á erlendum mörkuðum. Flest fyrirtæki hafi skuldir í erlendri mynt, og þær hækki líka með lækkuðu gengi. Hátt gengi krónunnar undanfarin ár hafi staðið hugbúnaðarfyrirtækjum fyrir þrifum, og því sé ljóst að leiðrétting á genginu hafi verið orðin löngu tímabær,þótt hún hafi farið út í öfgar undanfarið.