Jólafjör í Glasgow

Nú var komið að árlegu jólateiti hjá EJS UK hér í Glasgow. Við héldum stuttan stjórnarfund í gær og fórum í hádeginu út að borða til þess að halda upp á sextugsafmæli eins starfsmanns (á mánudag) og einnar stúlkunnar sem vinnur hjá fyrirtækinu. Við fórum á indverskan stað og fengum okkur karrý, sem er hálfgerður þjóðarréttur hér. Starfsmanninum var afhent fallegt úr og ermahnappar að gjöf. Ég brá aðeins á leik og afhenti honum Tópas vodkaskot sem ég sagði að hægði vel á öldruninni. Ég gaf síðan stúlkunni venjulegan Tópas með þeim orðum að hún þyrfti ekki á aldursverkuninni að halda :-)

Um kvöldið var farið í Jonglers klúbbinn sem er "Comedy Club" og þar fengum við paté í forrétt, einhvern grænmetisrétt og ostaköku í eftirrétt. Síðan var uppistand þar sem þrír grínistar fóru á kostum. Ekki náði ég samt öllu þar sem mig vantaði svolítið á að skilja menningarmuninn. Það er svona að vera útlendingur. Samt var þetta mun skárra heldur en árin tvö á undan þar sem bara var borðað og drukkið en engin skemmtun. Ég kláraði að hlusta á grínistana og hélt síðan heim á leið um hálf tólf. Reyndar var svo um fleiri því fólk drakk ansi stíft þarna og margir teknir að þreytast. Það var ekki langur gangur því þetta var við hliðina á bíóinu sem við fjölskyldan fórum á í síðustu viku á Bond myndina. Þess vegna var auðvelta að rata heim á Radisson.