Athyglisbrestur

Ég er aldeilis á snúning þessa sólarhringana. Ég var að leiðbeina vegna meistararitgerðar í gærmorgun, fór á stjórnarfund í GoPro, síðan út á völl að taka á móti Andrew McNair, sem er framkvæmdastjóri tengslanetsins Connect Scotland, en hann var fyrirlesari á ráðstefnu sem ég stýrði í dag um samskipti frumkvöðla og fjárfesta. Ég fór með hann í Bláa Lónið beint af vellinum í grenjandi rigningu og roki, sem reyndar skipti ekki máli þegar maður var komin ofan í en óttalegt þangað til. Ég skilaði Andrew á hótelið og fór í badminton en gigtin er ennþá að angra mig svo ég staldraði stutt við. Síðan var það Perlan um kvöldið þar sem var fiskihlaðborð og nú reyndi á mataræðið svo um munaði. Ég hélt mig við hvíta fiskinn en lagðist aðeins á reykta laxinn og var það stærsti glæpurinn þetta kvöldið.

Í morgun var ég mættur snemma á hótelið að sækja Andrew aftur og núna var haldið í salinn í Kópavogi þar sem ég stýrði áðurnefndri ráðstefnu auk pallborðsumræðna. Tókst þetta í alla staði vel og rúmlega 70 ráðstefnugestir ánægðir. Ég fór með Andrew á Kringlukrána í hádeginu og gat ekki annað en glott þegar ég pantaði mér grænmetisbuff og sódavatn og horfði á Andrew borða kjúklingasamloku, franskar og skola niður með stórum bjór. Eftir að hafa staldrað við á sýningunni í Fífunni keyrði ég Andrew út á völl. Þegar kom til baka var haldið í Kópavoginn aftur í listasafnið þar sem vaxtasproti ársins var útnefndur og var þá dagskráin loksins tæmd.